Ads

ကြော်ငြာ

Sunday, January 19, 2014


ဗိုလ်ချုပ်ကြီး ခင်ညွှန့်လက်ထက် စစ်ထောက်လှန်းရေးများ တန်ခိုးထွားစဉ်က နိုင်ငံရေးလှုပ်ရှားသူများကို ဖမ်းဆီး၊  နှိပ်စက်ထောင်ဒဏ်တွေ ချမှတ်ခဲ့တာနဲ့ပတ်သက်လို့
အမျိုးသားဒီမိုကရေစီအဖွဲ့ချုပ် NLD ရဲ့ သဘာပတိဖြစ်တဲ့ ဆရာကြီး ဟံသာဝတီ ဦးဝင်းတင်၊  လူ့ဘောင်သစ်ဒီမိုကရက်တစ်ပါတီရဲ့ခေါင်းဆောင်တစ်ဦးဖြစ်တဲ့ဒေါ်နှင်းနှင်းမွှေးတို့နဲ့ ဧရာဝတီမဂ္ဂဇင်း အင်္ဂလိပ်ပိုင်းအယ်ဒီတာကျော်စွာမိုးတို့ကဆွေးနွေးထားပါတယ်။

ကျော်စွာမိုး ။  ။   ၁၉၈၈ ခုနှစ် စစ်တပ်က  အာဏာသိမ်းပြီးတဲ့နောက် နိုင်ငံရေးပါတီတွေ၊  နိုင်ငံရေးသမားတွေ၊  နိုင်ငံရေးလှုပ်ရှားတက်ကြွသူတွေ၊ ကျောင်းသားအဖွဲ့အစည်းတွေကို ဘယ်လိုမျိုး အဲဒီအချိန်တုန်းက
နာမည်ဆိုးနဲ့ နာမည်ကြီးခဲ့တဲ့ ဗိုလ်ချုပ်ကြီးဟောင်းခင်ညွန့်ရဲ့ စစ်ထောက်လှမ်းရေး အဖွဲ့ကနေပြီးတော့ ဘယ်လိုဖမ်းဆီးခဲ့သလဲ၊
နိုင်ငံရေးလှုပ်ရှားမှုတွေကို ရပ်တန့်ဖို့ ကြိုးစားခဲ့သလဲဆိုတာ ကို ကျနော်တို့ဆွေးနွေးသွားမှာ ဖြစ်ပါတယ်။

ဒီနေ့ ကျနော်ဖိတ်ကြားထားတဲ့  ဧည့်သည်တွေကတော့ ၁၉၈၈ ခုနှစ်မှာဒေါ်အောင်ဆန်းစုကြည်နှင့်အတူ NLD ပါတီကို တည်ထောင်ခဲ့ပြီးတော့ လက်ရှိအချိန်မှာလည်း
NLD ပါတီရဲ့သဘာပတိအဖွဲ့ဝင်တဦးဖြစ် တဲ့ ဆရာကြီးဦးဝင်းတင် သူကလည်းပဲ စာနယ်ဇင်းလောကမှာပဲ တောက်လျှောက်ရေးသားခဲ့တဲ့ သတင်းထောက်၊
သတင်းစာဆရာတဦးလို့လည်းပြောလို့ရပါ တယ်။ နောက်တဦး ကျနော်တို့ ဖိတ်ကြားထားတာကတော့ ထောင်ထဲမှာနှစ်ကြိမ် စစ်ထောက်လှမ်းရေးရဲ့ ဖမ်းဆီးခြင်းကို
ခံရပြီးတော့ လက်ရှိ လူ့ဘောင်သစ် ဒီမိုကရက်တစ်ပါတီရဲ့ခေါင်းဆောင်တဦးဖြစ်တဲ့ မနှင်းနှင်းမွှေးတို့က ဒီဆွေးနွေးပွဲမှာ ဝင်ရောက်ဆွေးနွေးသွားမှာ ဖြစ်ပါတယ်ခင်ဗျာ။
ကျနော်ကတော့ ဧရာဝတီမဂ္ဂဇင်းရဲ့ အင်္ဂလိပ်ပိုင်းအယ်ဒီတာကျော်စွာမိုးဖြစ်ပါတယ်။

မနှင်းနှင်းမွှေးထောင်ထဲမှာ နှစ်ခါဖြတ်သန်းခဲ့ရတော့ အင်းစိန်ထောင်ရယ်၊ နောက်ဘယ်ထောင်မှာနေခဲ့ရသလဲ။

ဒေါ်နှင်းနှင်းမွှေး ။    ။  ကျမတို့က ၉ဝ စက်တင် ဘာ ဆန္ဒပြမှုမှာ ပါဝင်ခဲ့တာဆိုတော့ ကျမတို့ အမျိုး သမီး ၅ယောက်ပါတယ်။
 အမျိုးသားအဆောင်ဘက်ကတော့ ရာနဲ့ချီပြီးပါတယ်။  ကျမတို့ကို ရိုက်ပြီးတော့ ပထမတခါ သာယာဝတီအကျဉ်းထောင်ကို ပို့တယ်ပေါ့၊
 အဲဒီ အင်းစိန်ထောင်ကနေပြီးတော့ သာယာဝတီထောင်ကို သွားရာလမ်းတလျှောက်မှာ ရိုက်တယ်ပေါ့နော်။
တနေ့ကုန်လည်း  မစားရ မသောက်ရဘဲနဲ့ သာယာဝတီထောင်ကို ပြောင်းရွှေ့ခြင်း ခံရတယ်ပေါ့။
နောက်တခေါက်ကတော့ ၁၉၉၇ထောင်ကျတဲ့အခါမှာ အင်းစိန်ထောင်မှာ နေရတာပေါ့၊
 ပထမထောင်ကျပြီး နောက်တခေါက်ထောင် ကျတဲ့အချိန်မှာပေါ့နော်။ ထောင်က အခြေအနေဆိုးတာကိုတွေ့ရတယ်။
ကျမတို့ထောင်ကျတဲ့ အခါမှာ အမိန့် မကျမခြင်းပေါ့ ဘယ်သူနဲ့မှ မတွေ့ရဘူး၊  အခန်းနားနီးတွေနဲ့လည်း စကားမပြောရဘူး၊  ဝန်ထမ်းတွေနဲ့လည်း စကားမပြောရဘူး၊
ကိုယ်လိုအပ်တာကိုတော့ပြောပေါ့၊  ဒါပေမယ့် သူတို့ဘက်က ဘာမှဖြည့်ဆည်းပေးတာ မရှိဘူး။
ကျမတို့ ပုံစံခွက်နဲ့ ထမင်းဟင်းကျွေးတာကလွဲပြီးတော့ ကျန်တာကို မရဘူးပေါ့၊ ထောင်ဝင်စာလည်းပို့လို့မရဘူး၊
ဘေးအခန်းတွေနဲ့လည်း စကားပြောခွင့်မရဘူး၊  လမ်းလျှောက်ထွက်လို့လည်း မရဘူး၊ ရေချိုးတဲ့အချိန်မှာလည်း ကမန်းကတန်းချိုးရတာပေါ့၊
ကျမဆို အဝတ်တထည် ကိုယ်တခုနဲ့ ပါသွားတာဆိုတော့ အမျိုးသမီးတွေကြုံ ရတဲ့ ဒုက္ခကို တော်တော် ဆိုးဆိုးဝါးဝါး ခံရတာပေါ့နော်။
အဲဒီအချိန်မှာထောင်ထဲမှာ ကွပ်ပျစ်တို့ဘာတို့လည်း မပေးတဲ့အခါကျတော့ သမံတလင်းပေါ်မှာပဲ ဖျာကြမ်းနဲ့ အင်မတန်အေးတဲ့ဆောင်းတွင်းကို ဖြတ် သန်းရတာပေါ့၊  ဇန်နဝါရီလဆိုတော့။

ကျော်စွာမိုး။     ။ ထောင်ချလိုက် ပြီ  ဆိုပေမယ့်လည်း ထောက်လှမ်းရေးရဲ့  လက်အောက်က မလွတ်ဘူးလို့ပြောကြတယ်၊
နိုင်ငံရေးအကျဉ်းသားတွေ အပြင်ထွက်ပြီးတော့ဆေးကုဖို့  လိုအပ်လာမယ်၊  ကျန်းမာရေး အခြေအနေအရဆေးကုဖို့ လိုအပ်လာမယ်ဆိုရင် ထောက်လှမ်းရေးက ဘယ်လိုမျိုးတာဝန်ယူသလဲ၊
သူတို့ လက်မှတ်ရေး ထိုးပေးရတယ်လို့ကြားတယ်၊  အဲဒါကျတော့ ဘာတွေများ သိမလဲ။

ဒေါ်နှင်းနှင်းမွှေး ။     ။  ကျမကိုယ်တိုင်က အပြင်ကို ထွက်ပြီးတော့ဆေးကုရလောက်တော့ အခြေအနေမျိုးတော့ မရှိခဲ့ဘူးပေါ့လေ၊
မရှိခဲ့ဘူး ဆိုတာက ကျမကတော်ရုံတန်ရုံကိစ္စဆိုရင် ကျမမှာ ရှိတဲ့ဆေးဝါးနဲ့ပဲဖြေရှင်းတာမျိုးပေါ့၊
ဘာဖြစ်လို့လဲ ဆိုရင်ဆေးမှူးတခါခေါ်လို့ရှိရင် အရမ်းကြာတာ၊  အဆင့်ဆင့်တင်ရတယ်၊  ဆရာဝန်ကုသဖို့ လိုလို့ရှိရင်လည်း အဲဒီဆရာဝန်ကို အဆင့်ဆင့်တင်ရတယ်၊
 အရမ်းကြာတဲ့အခါကျတော့ ကျမတို့ ဒီမှာသေစရာ ရှိရင်သေလောက်ပြီဆိုတော့ ကျမတို့ဆေးဝါးတွေ အဆင်သင့်ဆောင်ထားကြတာမျိုးရှိတယ်၊
အဲဒါ ဆိုရင်ထောင်ကဝန်ထမ်းတွေကိုပြောပြီး ယူပြီးသောက်တာမျိုးပေါ့၊
တကယ်တမ်းအပြင်ကိုထွက်ပြီးဆေးကုရတဲ့အခါကျတော့ ကျမတို့နဲ့ အတူတူနေခဲ့ရတဲ့  အမျိုးသမီးတွေမှာဆိုရင် အခက်အခဲတွေဖြစ်ရတယ်၊
အဲဒီလိုပဲထောက်လှမ်းရေးတွေ ခွင့်မပြုလို့ထောင်ထဲမှာ ဆုံးသွားတဲ့လူတွေဆိုရင် အများကြီး ကြုံရတယ်ပေါ့လေ၊
  ဥပမာ ဦးတင်မောင်ဝင်းတို့လို လူမျိုး၊  ဦးစိုးဝင်းတို့လိုလူမျိုး သာမန်ဝမ်းကိုက်ရောဂါ ဆိုတာ အပြင်မှာ အလွယ်တကူပျောက်နိုင်တဲ့ရောဂါ မျိုးလေ၊
သွေးတိုးရောဂါနဲ့ ဆုံးပါးသွားတဲ့ ဦးညိုဝင်း လိုလူမျိုး၊   အဲဒီလိုမျိုး ဆုံးပါးသွားတာထောင်ထဲမှာ အများကြီးပဲလေ၊  လက်ရှိကျမတို့ စာရင်းအတိအကျ ဆိုရင် ၁ဝဝကျော်။
  ရာကျော်ဂဏန်းရှိတယ်ဆိုတာက ဒီထက်ပိုပြီးကောက်ရင်လည်း ဒီထက်ပိုပြီးရှိနိုင်တယ်။
ဘာဖြစ်လို့လဲဆိုတော့ စစ်ကြောရေးစခန်းမှာ ကွယ်လွန်သွားတဲ့လူတွေလည်း အများကြီးပဲရှိတယ်၊
 မန္တလေးက ဦးမောင်လေးတို့ လူမျိုးဆိုရင် စစ်ကြောရေးစခန်းမှာပဲ လုံးဝမဖြေနိုင်ဘူး မင်းတို့မေးချင်ရာမေး ငါကတော့ မဖြေနိုင်ဘူး၊  ငါရဲ့ ကိုယ်ရေးအကျဉ်းမေးရင်ဖြေမယ်၊  ကျန်တဲ့လူရဲ့အကြောင်းဆိုရင် မဖြေနိုင်ဘူး ဆိုလို့ ရိုက်ပြီး သတ်လိုက်တာပဲလေ။  အဲဒီလို မျိုးတွေ အများကြီးကြုံရတယ်လေ၊
အဲဒီလိုမျိုး စာရင်း မရှိ အင်းမရှိဘဲသေဆုံးသွားတဲ့ ရဲဘော်တွေလည်း အများကြီးရှိသေးတာပဲ။

ကျော်စွာမိုး ။     ။  အဘကိုယ်တိုင်ကရော ကြုံ ရလား၊  အဘကိုယ်တိုင်ထောင်ထဲမှာနေပြီးတော့ ဗိုက်ခွဲတာတွေပေါ့၊

ဦးဝင်းတင်။     ။  ကျနော်အဲဒီဟာနဲ့ပတ်သက် ပြီးတော့ တဆိတ်လောက်တော့ ပြောပါရစေ။  ခုန မနှင်းနှင်းမွှေးပြောတဲ့ထဲမှာပါလို့ ဖျာနဲ့အိပ်ရတယ်ဆိုလို့။
ကျနော်တို့ဟာ စစ်ကျောရေးထဲမှာပို့တာ ဇန်နဝါရီဆောင်းတွင်းကြီး၊ ဆောင်းတွင်းဆိုတော့ ဗမာပြည်မှာလည်း ချမ်းတာပဲ၊  အဲဒီအချိန်မှာ သူတို့ကဖျာကို မပေးတော့ဘူးဗျ၊
ဖျာကိုသိမ်းယူသွားတယ်၊  တိုက်တိုက်ဆိုင်ဆိုင်ပဲ ကိုသက်ခိုင်က သူ့ကိုယ်သူ အကြောကို ဓားနဲ့ လှီးတယ်၊  ကိုသက်ခိုင်ဓားနဲ့လှီးတယ်ဆိုရော သတင်းက ဘယ်လိုလဲဆိုတော့
 ဓားနဲ့လုပ်တယ်ဆိုရင် သူတို့တွေကို ဆူမှာစိုးလို့ သူတို့ဘယ်လိုလုပ်လဲဆိုတော့ ဝါးနှီးကြောကနေ ဖြတ်တယ်လို့ပြောတယ်၊
 သူတို့က အဲဒါကိုအကြောင်းပြုပြီးတော့  နှီးဖျာတွေ အကုန်လုံး သိမ်းသွားရော၊  ကျနော်တို့ ဖျာမရှိဘဲနဲ့ သမံတလင်းပေါ်မှာ အိပ်ရတယ်၊  သမံတလင်းပေါ်မှာနေရတယ်၊  ဒါကတခု၊
ဆေးရုံတွေ ဘာတွေပို့တာနဲ့ ပတ်သက်ပြီးတော့ ကျနော်ပြောစရာတွေရှိတယ် ဗိုလ်ခင်ညွန့်ကိုယ်တိုင်ကအစ အထက်အမိန့်ပေးတယ်၊
အထက်အမိန့်ပေးတယ်ဆိုပြီး သူတို့တောင်း ပန်ရမယ့်ထဲမှာ ဒါတွေပါတယ်၊  အထက်အမိန့်ပေးတယ် ဆိုပြီးတော့ သူတို့ကိုယ်တိုင်က ဆိုပါတော့ဗျာ။
 ကျနော်အူခွဲရတယ်ဆိုပါတော့ နှလုံးရောဂါနဲ့ဆေးရုံပို့ရတာရှိတယ်၊  ဆီးကျိတ်ရောဂါနဲ့ဆေးရုံ ပို့ရတာရှိတယ်၊
အဲဒီပို့မယ့်နေရာတွေမှာ မပို့တဲ့ ရက်တွေအများကြီးရှိတယ်။ ကျနော် အူကျလို့ ခွဲမယ့်နေရာမှာ ၁၉၉ဝ ဇန်နဝါရီလမှာ သိသိတာတာ ကြီးကို အူမှာ အဖုပေါက်လာတယ်၊
နောက်ပိုင်းမှာ ကျနော် အိပ်ရာထဲမှာ လဲကျနေတယ်၊  မထနိုင်ဘူး၊  အဲဒါမျိုးဆိုရင် သူက လာစစ်၊  တံခါးဖွင့်ပြီးတော့ လှဲနေတာကိုဆေးထိုးပေးပြီး အဲဒီလိုနဲ့  ၅ နှစ်တိတိ ကြာတဲ့အခါကျမှာ ၁၉၉၅ မှ ကျနော်ကိုထောင်ပို့တယ်၊
၅ နှစ်ဝေဒနာခံစားရတယ်၊  အဲဒါက အကုန်လုံးက ဦးသန်းရွှေတယောက်တည်းပဲ အမိန့်ချတာ မဟုတ်ဘူး၊
သူတို့သူတို့အောက်ခြေကလူတွေ ဗိုလ်ခင်ညွန့်အပါအဝင်အောက်ခြေက လူတွေက သူ့ဟာသူ ဆုံးဖြတ်ပြီးတော့ ဒီလူတော့သေပါစေ၊  ဒီလူတော့ ဘာဖြစ်စေဆိုတဲ့ ပုံစံမျိုးနဲ့ လုပ်တယ်လို့ ကျနော်တော့ပြောချင်တယ်။
အဲဒါတွေဟာ ဗိုလ်ခင်ညွန့်ကစပြီးတော့ အကုန်လုံး တာဝန်ရှိတယ်၊   အဲဒီ ဦးသန်းရွှေပေါ်ချည်းပဲ တာဝန်လွှဲလို့မရဘူး။

ကျော်စွာမိုး။     ။  နိုင်ငံရေးလှုပ်ရှားသူတွေကို ကိုင်တွယ်တဲ့နေရာမှာ ထောက်လှမ်းရေးက အဓိကပဲ မဟုတ်လား။

ဦးဝင်းတင်။     ။ သူတို့တွေအကုန်လုံး တာဝန် ရှိတယ်။

ဒေါ်နှင်းနှင်းမွှေး ။  ။  သူတို့က၊  သူ့အထင်တိုင်း လုပ်နိုင်တယ်ဆိုတာက ဘာပဲပြောပြော သူ့ကို လုပ် ပိုင်ခွင့်ပေးခဲ့တဲ့ခေတ်နဲ့စနစ်နဲ့ အာဏာရဲ့
အကြောင်းရင်းခံကြောင့် ဖြစ်လာတာပေါ့နော်၊  နို့မို့ဆိုလို့ရှိရင် သူက ဒီလူကို ထင်တိုင်းဖမ်းတယ်၊  ထင်တိုင်း သတ်တယ်၊
ထင်တိုင်းထောင်ချတယ်ဆိုတာက သူ့တကိုယ် တည်းအနေနဲ့ လုပ်လို့မရဘူး၊  သူ့ကိုနောက်ကွယ်ကနေ  Force Authorities  ထက်ပိုတဲ့
Over Authorities ပေးထားတဲ့ စစ်အာဏာရှင်စနစ်နဲ့  အဲဒီခေတ် အဲဒီကာလက သူပြောတဲ့အထဲမှာပါတဲ့ အဲဒီခေတ်ရဲ့ ဥပဒေနဲ့ အမိန့်အာဏာတွေကြောင့်ပေါ့နော်၊
ကျမတို့က ဘာမှန်းမသိဘဲနဲ့ ဥပဒေကဲ့သို့ အာဏာတည်တဲ့အမိန့်ဆိုတဲ့ စစ်အုပ်ချုပ်မှုအောက်မှာ ဖြတ်သန်းခဲ့ရတယ်၊
အဲဒီအောက်မှာထောက်လှမ်းရေးဆိုလို့ရှိရင် သာမန်ပြည်သူတွေအနေနဲ့ အသံ ကြားရုံနဲ့ ဖိမ့်ဖိမ့်တုန်အောင်ကြောက်ရတယ်၊
 နိုင်ငံရေးသမားတွေဆိုလို့ရှိရင် စိုးရွံ့နေရတယ်၊  ကျမတို့ ဆိုလို့ရှိရင် အိမ်ရှေ့မှာ စစ်ကားရပ်ပြီးတော့ သူတို့ရဲ့ကြော်ငြာချက်တွေကို  ည သန်ခေါင်ကျော် ၁၂ နာရီ  ၁ ချက် အဲဒီအခါကျမှ  အသံချဲ့စက်တွေဖွင့်ပြီးတော့ သူတို့ရဲ့ကြော်ငြာချက်တွေကို အိမ်ထဲကို လှည့်ပြီးအော်တယ်၊
အိမ်ရှေ့မှာ ဆိုင်ကယ်ရပ်သံကြားရင် ငါ့ကို လာဖမ်းတာလားဆိုပြီးတော့ဖြစ်ရတယ်၊
ဒီ ရပ်ကွက်ထဲ လမ်းထဲတွေ၊  လက်ဖက်ရည်ဆိုင်တွေမှာ ဆိုလို့ရှိရင်  သတင်းပေး ဆိုတဲ့ဟာတွေ မမြင်ချင်မှ အဆုံး၊
ဒီအတွက် နိုင်ငံတော်က ကုန်ကျခဲ့တဲ့စရိတ်တွေ။

ကျော်စွာမိုး။     ။ နောက်တခုက အဘလည်း ပြောသွားတယ်၊  မနှင်းနှင်းမွှေးလည်းပြောခဲ့သလိုပေါ့  ကျနော် သိလောက်ဆိုရင် ၁၆၂ယောက်ရှိတယ်၊
 ၁၉၈၈နောက်ပိုင်းပေါ့၊ ထောင်ထဲမှာနဲ့ ထောက်လှမ်းရေးစခန်းမှာ သေဆုံးသွားတဲ့သူတွေပေါ့၊  ခုနလိုမျိုးဝေဒနာတွေခံစားပြီးတော့၊  ပြီးတော့ ထောင်ကျတဲ့ လူပေါင်းဆိုရင်လည်း
ကျနော်ထင်တယ် ၁၉၈၈၊  ၈၉၊  ၉ဝ တို့ဆိုရင်ထောင်ထဲမှာ နိုင်ငံရေးအကျဉ်းသားတွေ ၃ဝဝဝ၊  ၄ဝဝဝလောက်ရှိတယ်လို့ပြောကြတယ်၊  အမြဲတမ်းပေါ့လေ၊
 တလျှောက်လုံးကို တွက်ကြည့် မယ်ဆိုရင် မနှင်းနှင်းမွှေး ဘယ်လောက်လောက် ရှိ မယ်လို့ ထင်လဲ၊  တချို့က ကျတယ်၊  ပြန်လွတ်သွားတယ်၊  အဘကျတော့
တလျှောက်လုံးရှိတယ်လေ၊   သုံးနှစ်နေပြီး ပြန်လွတ်သွားနောက်တခါ အစ်မက ပြန်ဝင်လာတယ်၊  လူသစ်တွေနဲ့ ကျတာရှိတယ်၊
ကျနော်ထင်တယ် ဒီတလျှောက်လုံးမှာ ထောက်လှမ်းရေးကနေ ချခဲ့တဲ့ ဒီနှစ်၂ဝ အတွင်းမှာ ၂ဝဝ၄ပေါ့ သောင်းနဲ့ ချီမလား။

မနှင်းနှင်းမွှေး ။        ။  ဖြစ်နိုင်လောက်ပါတယ်၊  ဘာဖြစ်လို့လဲဆိုတော့ ကျမအတွေ့အကြုံအရဆိုရင် ဒီ ဘိုကလေး အရေးအခင်းဆိုရင် ကရင်တွေကို ဘာမှမသိတဲ့
ကရင်ဟောင်းတွေကို ဖမ်းပြီးတော့ထောင်ထဲမှာ အစာရေစာပြတ်လပ်ပြီး သေအောင် လုပ်ခဲ့တာပဲလေ။  အဲဒီလိုမျိုးဆိုရင် ဒါဟာ ရာနဲ့ချီနေ တာပဲလေ။
နောက်တောင်ငူမှာဆိုလို့ရှိရင် ကျမ အမျိုးသားကတောင်ငူထောင်က ထွက်လာတာကို
သူတို့တောင်ငူထောင်မှာဆိုလို့ရှိရင် KNU နဲ့ပတ် သက်လို့ ဆက်နွှယ်လို့ဆိုပြီး တောင်ပေါ်ဒေသတွေ က ဒီလိုပဲ ကိုယ့်အမျိုးသားတွေကို ဆက်နွယ်ပတ်သက်မှုတော့ ရှိကြတာပေါ့၊  သူတို့ကိုယ်သူတို့ နိုင်ငံရေး ပတ်သက်ပြီးတော့ထောင်ကျတာလို့ ၁၇ (၁) နဲ့ ကျမှန်းမသိ၊  ၁၇ (၂) နဲ့ကျမှန်းမသိ
အဲဒီလောက် ရိုးသားတဲ့ ကရင်တွေထောင်ထဲမှာ ရာနဲ့ချီပြီးရှိတယ်၊   ပြီးတော့ နိုင်ငံရေးအကျဉ်းသား စာရင်းကောက်တဲ့ အချိန်မှာလည်း သူတို့ကိုယ်သူတို့ နိုင်ငံရေးအကျဉ်း သားမှန်း  မသိတဲ့သူတွေ  အများကြီးပဲ။  ဒီတော့သောင်းနဲ့ချီပြီး ရှိနိုင်ပါတယ်။

ဦးဝင်းတင် ။     ။  ကျနော်ကတော့ ဒီလိုပြော ချင်ပါတယ်။  စာရင်းအင်းတွေတော့ ဒီလောက်မသိဘူး၊  ဘာဖြစ်လို့လဲဆိုတော့ ကျနော်က အကျဉ်းသား အဖွဲ့အစည်းတွေကို
ကိုင်တာ မဟုတ်လို့၊  လက်သုံး စကားကတော့ မီဒီယာတွေမှာပြောတဲ့စကားကတော့ ၁၉၈၈နောက်ပိုင်းမှာထောင်ကျတဲ့သူတွေ ပြန်ဝင် တာတို့ ထွက်တာတို့ပေါ့။
သောင်းဂဏန်းနဲ့ချီပြီးရှိတယ်၊  အဲဒီသောင်းဂဏန်းနဲ့ချီပြီးရှိတဲ့သူတွေကနေ သူတို့ရဲ့ သားသမီးတွေ မိသားစုနဲ့ဆိုရင် သိန်းဂဏန်းနဲ့ချီပြီးတော့ရှိတယ်၊
အဲဒီလူတွေအားလုံးအတွက်ကို တာဝန် ယူရမယ်၊ တောင်းပန်ရမယ်၊  ခင်ဗျားတို့ရဲ့အကျင့်ဆိုးတွေကိုလည်း ပြင်ရမယ်၊
 အဲ့ဒီလူတွေဘဝ ပြန်လည် ရပ်တည်ဖို့အတွက် လုပ်ပေးရမယ်၊  ကျနော် ကိုးကားတဲ့ ကိန်းကဏန်းကတော့သောင်းဂဏန်းလောက်ပဲ၊
ကျနော့်ဂဏန်းကတော့ သူတို့လို အဖွဲ့အစည်းကိုင် တဲ့ စုဆောင်းတဲ့သူတွေနဲ့ ညီသွားတဲ့အခါကျတော့ ကျနော်လည်း ဝမ်းသာပါတယ်၊
ဘာလို့လဲဆိုတော့ မှန်တဲ့နီးပါး ဖြစ်သွားလို့ပေါ့။

ကျော်စွာမိုး ။     ။  ဒီနေရာမှာနောက်တခုက မနှင်းနှင်းမွှေး ထောင်ထဲကို နိုင်ငံရေး လုပ်တဲ့သူတွေထောင်ထဲထည့်လိုက်တာ မဟုတ်ဘဲနဲ့ထောင်ရွှေ့လိုက်တဲ့ ပုံစံမျိုးပေါ့၊
အဲဒါဟာလည်း တနည်းအားနှင့် နှိပ်စက် မှုတမျိုးပေါ့၊  ဘယ်လိုနှိပ်စက်မှုလည်းဆိုတော့ အကျဉ်းသားကိုသာမကဘဲ အပြင်ကလိုက်ပြီးတော့ အကျဉ်းသားကိုထောင်ဝင်စာတွေ့တဲ့
မိသားစုကိုပါ စီးပွားရေး ချွတ်ခြုံကျအောင်၊  အချိန်ကုန်အောင်၊  ပိုက်ဆံကုန်အောင် အဲဒီလိုမျိုး လုပ်တဲ့ရည်ရွယ်ချက်ပေါ့၊
အစ်မကိုယ်တိုင်ကလည်းထောင်ပြောင်းခံခဲ့ရတာဆိုတော့။

မနှင်းနှင်းမွှေး။     ။  ကျမတို့ အကျဉ်းချပြီးသွားလို့ရှိရင်၊  အမိန့်ချပြီးသွားလို့ရှိရင် နှစ်ပတ်တခါတွေ့ ခွင့်ရတယ်လေ၊  အဲဒီလိုတွေ့ခွင့်ရတဲ့အခါကျတော့ ကျမတို့အိမ်က
ပုံမှန်လာတွေ့တယ်ပေါ့နော်။  ဒါတောင်မှ သာယာဝတီထောင်ဆိုတာ ရန်ကုန်နဲ့အနီးဆုံးထောင်ပေါ့လေ၊  အဲဒီထောင်ကိုရောက်သွားတဲ့ အခါကျတော့ အလွန်ဆုံး တလကို တခါပဲလာတွေ့နိုင်တယ်၊
နောက်ပိုင်း ဒီထက်ဒီထက်ဝေးတဲ့ထောင်ကို သွားလို့ရှိရင် တချို့လူတွေဆိုရင်ထောင်ကသာလွတ် လာတာ တခါမှ ထောင်ဝင်စာ လာတွေ့နိုင်တဲ့သူ မရှိဘူးလေ၊
  ကိုကျော်စွာမိုးတို့လည်း ဒါကိုကြုံဖူးတဲ့အခါ ကျတော့ထောင်ထဲမှာထောင်ဝင်စာတွေ့တယ် ဆိုတာ ပစ္စည်းပစ္စယတခုတည်းအတွက် မဟုတ်ဘူး၊
 ကိုယ့်မိသားစုနဲ့တွေ့တဲ့အခါမှာ ခံစားလိုက်ရတဲ့ စိတ်ခံစားမှုမျိုးပေါ့၊  အဲဒါကိုမြင်ရတဲ့အခါမှာ လူတွေက အကျဉ်းထောင်ထဲမှာ အကျဉ်းခံရတာထက် ပိုပြီးတော့ စိတ်ပိုင်းဆိုင်ရာ ပိုခံစားရအောင် လုပ်တယ်လို့ ကျမကတော့ ယူဆတယ်။

ကျော်စွာမိုး ။     ။    ပြီးခဲ့တဲ့ကာလ တလျှောက်လုံး  ငြိမ်းချမ်းစွာ  ဆန္ဒပြတာ ၁၄၊  ၁၅ နှစ်တွေလည်း ပါ တယ်၊  ပညာတတ် ဆရာဝန်တွေလည်းပါတယ်၊  ရှေ့နေတွေလည်းပါတယ်၊  အင်ဂျင်နီယာတွေလည်း ပါတယ်။
ထောင်ကျတဲ့အထဲမှာပေါ့၊  အဘတို့လို ပါတီခေါင်းဆောင်တွေ ၊  စာနယ်ဇင်းတွေလည်း ပါတယ်ပေါ့လေ။
ဒါဆို တချို့ကပြောကြတယ် လူသားဆန့်ကျင်ရေးပြစ်မှုပေါ့။  အဲဒါနဲ့ဆိုရင် ဘယ်လောက်အထိ ကိုက်ညီမှုရှိလဲ။

ဦးဝင်းတင် ။     ။  ကျနော်ပြောမယ်ဗျ၊  ဒီလို ၂ဝဝ၉  မှာ ဒီကိစ္စတွေ ထွက်လာတာပေါ့ဗျာ၊  အမေရိကားမှာလည်း ထွက်လာတယ်၊  လူ့အခွင့်အရေး အဖွဲ့အစည်းတွေကလည်း ပြောတယ်၊
 ကုလသမဂ္ဂ မှာလည်း ဒီကိစ္စတွေတင်တယ်၊  တင်တဲ့အခါကျတော့ ကျနော်တို့ ဒီလူတွေကို ပြည်သူတရပ်အနေနဲ့တရားစွဲ ရမယ်ပြောတယ်၊
ကျနော်လည်း အများကြီးပြောခဲ့တယ်။  ဒီလူတွေဟာ လူသားဆန့် ကျင်ရေး ပြစ်မှုတွေကို ကျူးလွန်တဲ့သူတွေ ဒီလူတွေကို တရား စွဲရမယ်၊  ဘယ်လိုလူတွေလဲ ဆိုတော့
ဗိုလ်ချုပ်ခင်ညွန့်တို့၊  ဦးသန်းရွှေတို့ ကုန်ကုန်ပြောရရင် ဦးသိန်းစိန်လည်းပါတယ်၊  ဦးသိန်းစိန်လည်း လူသားဆန့်ကျင်ရေးအဖွဲ့ထဲမှာပါတယ်၊

ကျော်စွာမိုး။     ။  ဒါပေမယ့် သူ့အစိုးရလက်ထက်မှာတော့ နိုင်ငံရေးအကျဉ်းသားတွေ အများကြီးကို လွှတ်ပေးတယ်လေ။

ဦးဝင်းတင်။     ။  ဒါတပိုင်းပေါ့လေ၊   အဲဒါကလည်း အာပတ်ဆိုတာ ဖြေချင်တိုင်းဖြေလို့ရတာ မဟုတ်ဘူး၊  အာပတ်သင့်တဲ့ ဘယ်လောက်ကြီးတဲ့ အာပတ်ကို
ကျူးလွန်ပြီးတော့ လွတ်သလဲ ဆိုတာလည်း အဲဒါတော့မရဘူးပေါ့၊  ဒါကတော့ မဆိုင်ဘူး ထင်တယ်၊  ဒီလူတွေဟာ အကုန်လုံးပေါ့။
 ၂ဝဝ၉ မှာ ဒီဟာလုပ်တဲ့အခါကျတော့ အမေရိကားမှာလည်းတော်တော်လုပ်ကြတယ်၊  အမေရိကားက ကိုအောင်ဒင်တို့ဆိုရင်တော်တော်လေး ဒီကိစ္စကို အာရုံစိုက်ကြတယ်၊
သူတို့လည်းလိုက်ကြည့်တယ်၊  အမေရိကန် ပါတယ်ပေါ့ဗျာ၊ တော်တော်လေး နိုင်ငံ ၁၃ နိုင်ငံလောက် ပါလာတယ်။
စစ်တပ်ကလည်း ဒါကိုသိတဲ့ အခါကျတော့ ဦးသန်းရွှေတို့ဘာတို့ အကုန်လုံး ကိုပြောင်းလိုက်ပြီးတော့ ဒီပုံစံတွေ မရတော့ဘူး၊
 ကမ္ဘာ ကနေ သူတို့ကို လည်ပင်းညှစ်တော့မယ်ဆိုပြီးတော့ ပြောင်းလိုက်ပြီးတော့ ပြောင်းတဲ့အပေါ်မှာ မူတည် ပြီးတော့ သူတို့ပြောင်းရကျိုးလည်း နပ်ပါတယ်၊
သူတို့လည်း အခုတော့ နည်းနည်းလွတ်သလိုဖြစ်သွားတာပေါ့၊  ဒါပေမယ့် ကျနော့်သဘောကတော့ ဒီ လူသား ဆန့်ကျင်နေတဲ့ ပြစ်မှုတွေဟာ ဒီနေ့အထိရှိနေတုန်းပဲ။
ဒီလူတွေဟာ တာဝန်ရှိတုန်းပဲ၊  ဒီလူတွေဟာ လူသားဆန့်ကျင်မှု ရာဇဝတ်မှုကိုကျူးလွန်တဲ့ လူတွေ ဆိုတာကို သမိုင်းမှာ မှတ်တမ်းဝင်နေတယ်။  သမိုင်း ဆိုကတော့ သူက တရားသူကြီးမဟုတ်တဲ့အတွက် အပြစ်တော့ မပေးနိုင်ဘူးပေါ့၊  သမိုင်းကတော့ မှတ် တမ်းမှာ ဘယ်တော့မှမမေ့ဘူး၊   အဲတော့ သမိုင်းမှတ် တမ်းထဲမှာ ဒီလူတွေဟာအလွန်ကိုဆိုးရွားတဲ့သူတွေ၊  လူသား ဆန့်ကျင်မှု ရာဇဝတ်မှုတွေကို ဆန့်ကျင်တဲ့ သူတွေ အနေနဲ့တော့ မှတ်တမ်းတင် ရှိနေတယ်လို့  ကျနော်ကတော့ အဲလိုမျိုးပြောချင်ပါတယ်။

ကျော်စွာမိုး။     ။  အဘဦးဝင်းတင်၊  မနှင်းနှင်းမွှေး၊  အခုလို ဝင်ရောက်ဆွေးနွေးပေးတဲ့အတွက်ကျေးဇူးအများကြီးတင်ပါတယ်ခင်ဗျာ။
အခုကျနော် တို့ဆွေးနွေးပွဲကနေပြီးတော့ကောက်ချက်ချကြည့် မယ်ဆိုရင်တော့ ၁၉၈၈နောက်ပိုင်းမှာ နိုင်ငံရေး သမားတွေ၊
နိုင်ငံရေးတက်ကြွလှုပ်ရှားသူတွေ၊ ကျောင်းသား လူငယ်တွေကို ဖမ်းဆီးချုပ်နှောင် နှိပ်စက်ပြီးတော့ နှစ်ရှည်လများစွာ ထောင်ချ အကျဉ်းချခဲ့တာကတော့ အဓိကအားဖြင့်  စစ်ထောက်လှမ်းရေးအဖွဲ့လို့ ကျနော်တို့ သုံးသပ်လို့ရပါတယ်ခင်ဗျာ။
ဒါပေမယ့် အခုအချိန်ထိ ဘယ်သူ့မှ တာဝန်ရှိသလဲ ဆိုတာကတော့ တိတိကျကျ အမှန်တရားဖော်ထုတ် နိုင်တဲ့အခြေအနေကို ကျနော်တို့မတွေ့ရသေးပါဘူး၊
ဘယ်အချိန်မှာလည်း ဒါကိုဖော်ထုတ်နိုင်မလဲဆိုတာကို လက်ရှိနိုင်ငံရေးအခြေအနေအရ ကျနော်တို့မှာ တိတိကျကျပြောနိုင်တဲ့အခြေအနေ မဟုတ်ဘူးလို့ သုံးသပ်လို့ရပါတယ်ခင်ဗျာ၊  အားလုံးပဲကျေးဇူးတင်ပါတယ်။

ဆက်လက်ပြီး ပြည်သူတွေကိုတောင်းပန်ရမယ်(1 ) ကိုဖတ်နိုင်ပါတယ်
Irrawaddy ဧရာဝတီ သတင်း

0 comments:

Search Our Site