၁၂၃ ကြိမ်မြောက် ကမ္ဘာ့အလုပ်သမားနေ့ အခမ်းအနားကို ထိုင်း-မြန်မာနယ်စပ်
မဲဆောက်မြို့က မြူနီစီပယ်ဘောလုံးကွင်းမှာ မြန်မာအလုပ်သမားရေး
လုပ်ဆောင်နေတဲ့ အဖွဲ့အစည်းတွေအပါအ၀င် ထိုင်းအစိုးရတာဝန်ရှိသူတွေ
လုပ်ငန်းရှင်တွေနဲ့ ထိုင်းအလုပ်သမား ကာကွယ်ရေးဌာနတို့ ပူးပေါင်းပြီး
ဒီကနေ့မနက်ပိုင်းမှာ ကျင်းပခဲ့ပါတယ်။
မြန်မာရွှေ့ပြောင်းအလုပ်သမား ၂၀၀၀ လောက်ပါဝင်ပြီး မဲဆောက်ရဲဌာနရုံးကြီးဝင်းကနေ အခမ်းအနားကျင်းပမယ့် မဲဆောက်မြို့နယ် မြူနီစီပယ်ဘောလုံးကွင်းရှိရာကို ချီတက်ခဲ့ကြပါတယ်။
ယခုနှစ်မှာ ထိုင်းနိုင်ငံအတွင်း မြန်မာရွှေ့ပြောင်းအလုပ်သမားတွေ
ဝင်ရောက်တဲ့အခြေအနေဟာ နှစ်နိုင်ငံသဘောတူညီမှု MOU ပုံစံအပါအ၀င်
အခြားနည်းလမ်းမျိုးစုံနဲ့ တိုးပွားလာတဲ့အတွက် အလုပ်သမားအခွင့်အရေး
ချိုးဖောက်မှုတွေ ပိုများလာတယ်လို့ ရွှေ့ပြောင်းအလုပ်သမား အခွင့်အရေး
မြှင့်တင်ရေး လုပ်ဆောင်မှုအဖွဲ့ MRPWG ရဲ့ ဦးဆောင်ကော်မတီဝင်ဖြစ်တဲ့
ကိုဗညားက အခုလို ပြောပါတယ်။
"မြန်မာအလုပ်သမားတွေ
အရမ်းကိုများလာတယ်၊ အဲအချိန်မှာ အခြေခံအခွင့်အရေးတွေ တောင်းဆိုရာမှာ
အခက်အခဲတွေ ကြုံတွေ့နေရပါတယ်၊ အလုပ်သမားတစ်ယောက်ပျက်တာနဲ့
နောက်တစ်ယောက်ကို သူတို့ကထပ်ခန့်တယ်၊ ဒီအလုပ်သမားတွေကို
ယာယီအလုပ်သမားလောက်ပဲ ခန့်ပြီးတော့မှ အခြေခံအခွင့်အရေး တော်တော်များများကို
လျစ်လျူရှုခြင်းခံရတယ်၊ ပြီးတာနဲ့ ဒီလိုပြန်ပို့ အသစ်အုပ်စုကို
ပြန်ခေါ်ပြီးတော့ အဲလိုအလုပ်သမား အခွင့်အရေးတွေ ချိုးဖောက်နိုင်တဲ့နည်းလမ်းတွေကို
ကျနော်တို့တွေ့ရတယ်၊ အခုနောက်ပိုင်း ဝင်လာတဲ့ MOU အုပ်စုပဲပြောပြော၊
ထိုင်းနိုင်ငံမှာ အလုပ်သမားတွေက ဆယ်ကျော်သက်တွေများတယ်၊
ကိုယ့်အမိမြန်မာနိုင်ငံမှာ ပြန်ပြီးတော့မှ စီးပွားရေးအရ၊ လူမှုရေးအရ
ပြန်လည်ထူထောင်ဖို့အတွက် လူအင်အားတွေ အများကြီးလိုအပ်တယ်၊ ဒီအင်အားတွေဟာ
မြန်မာနိုင်ငံမှာ ရှိသင့်သလောက်မရှိဘူး "
မဲဆောက်ဒေသတွင်း ဒီနှစ်ကျင်းပတဲ့ မေဒေးနေ့ အခမ်းအနားတွေကို ရွှေ့ပြောင်းမြန်မာအလုပ်သမားတွေ လွတ်လွတ်လပ်လပ် သွားလာတက်ရောက်ခွင့်ရှိပြီး၊ ထိုင်းရဲတပ်ဖွဲ့ဝင်တွေရဲ့ စစ်ဆေးပိတ်ပင်မှုတွေ မရှိသလောက်ဘဲလို့ အလုပ်သမားတွေက ပြောပါတယ်။
အလားတူ ကမ္ဘာ့အလုပ်သမားနေ့ အခမ်းအနားတွေကို ရောင်ခြည်ဦး
အလုပ်သမားများအဖွဲ့၊ မြန်မာနိုင်ငံအလုပ်သမား သွေးစည်းညီညွှတ်ရေးအဖွဲ့ BLSO
စတဲ့ အဖွဲ့အစည်းတွေက နေရာတွေခွဲပြီး ကျင်းပခဲ့ကြသလို တာ့ခ်ခရိုင် အလုပ်သမား
ကာကွယ်ရေးရုံးက ကမကထပြုပြီး ဘန့်ဆောင်ခွဲအရပ်မှာလည်း ကျင်းပခဲ့ကြောင်း
သတင်းရရှိပါတယ်။
0 comments:
Post a Comment