တောင်ကိုရီးယားသမ္မတသစ် ကျမ်းသစ္စာကျိန်ဆိုပြီ
ပတ်ဂွန်ဟေးဆိုတာ
ကမ္ဘာကျော်မြင်းစီးအက
ကျမ်းသစ္စာမဆိုမီ မြင်းစီးခြင်း
ကျွန်တော်တွေးမိတာတွေ
စောင့်ကြည့်ကြစို့
တောင်ကိုရီးယားသမ္မတအဖြစ် ရွေးကောက်တင်မြှောက်ခြင်းခံထားရတဲ့ ပတ်ဂွန်ဟေးဟာ
ဒီကနေ့ ဖေဖော်ဝါရီလ ၂၅ ရက်နေ့မှာ သမ္မတအဖြစ် ကျမ်းသစ္စာကျိန်ဆိုခဲ့ပြီ
ဖြစ်ပါတယ်။ သူ့အနေနဲ့ တောင်ကိုရီးယားသမ္မတနိုင်ငံရဲ့ ၁၁ ဦးမြောက်
သမ္မတဖြစ်လာခဲ့တဲ့အပြင် နိုင်ငံ့သမိုင်းမှာ ပထမဆုံးသော အမျိုးသမီးသမ္မတလည်း
ဖြစ်လာခဲ့ပါတယ်။ ပရိသတ် ၇ သောင်းကျော် တက်ရောက်ခဲ့တဲ့ ကျမ်းသစ္စာကျိန်ဆိုပွဲ
အခမ်းအနားကို ဆိုးလ်မြို့တော်မှာ ကျင်းပပြုလုပ်ခဲ့တာ ဖြစ်ပါတယ်။
မနေ့ညကတော့ သမ္မတတာဝန် စတင်ထမ်းဆောင်တဲ့ အထိမ်းအမှတ်အဖြစ်
ဆိုးလ်မြို့လယ်မှာရှိတဲ့ ဧရာမခေါင်းလောင်းကြီးမှာ ခေါင်းလောင်းထိုးပွဲ
ကျင်းပပြုလုပ်ခဲ့ပြီး ဖြစ်ပါတယ်။
၁၉၅၂ ခုနှစ် ဖေဖော်ဝါရီလ ၂ ရက်နေ့မှာ မွေးဖွားခဲ့သူတစ်ဦးပါ။ သူအပါအ၀င်
မောင်နှမသားချင်း ၃ ဦး ရှိပါတယ်။ မောင်တစ်ဦးနဲ့ ညီမတစ်ဦးဖြစ်ပါတယ်။
သူ့ဖခင်ကတော့ တောင်ကိုရီးယားနိုင်ငံရဲ့ တတိယမြောက်သမ္မတအဖြစ်
တာဝန်ထမ်းဆောင်ခဲ့ဖူးတဲ့ ပတ်ချုံဟီး ဖြစ်ပါတယ်။ မြန်မာတွေအတွက် မစိမ်းလှတဲ့
နာမည်တစ်ခုဖြစ်ပါတယ်။ အထူးသဖြင့် ဘောလုံးဝါသနာရှင်တွေ အတွက်ပေါ့။
တစ်ချိန်တုန်းက တောင်ကိုရီးယား ပတ်ချုံဟီးဖလား ဘောလုံးပြိုင်ပွဲဆိုတာ
ဒေသတွင်းမှာ နာမည်ကြီး ပြိုင်ပွဲတစ်ခု ဖြစ်ပါတယ်။ မြန်မာအသင်းဟာ
ပတ်ချုံဟီးဖလား ပြိုင်ပွဲမှာ ဗိုလ်စွဲခဲ့ဖူးတဲ့ အသင်းတစ်သင်း ဖြစ်ပါတယ်။
သမ္မတသစ် ပတ်ဂွန်ဟေးဟာ ထိုင်ဝမ်မှာရှိတဲ့ တရုတ်ယဉ်ကျေးမှုတက္ကသိုလ်က
ပေးအပ်ထားတဲ့ ဂုဏ်ထူးဆောင်ဒေါက်တာဘွဲ့ အပါအ၀င် ဂုဏ်ထူးဆောင်ဒေါက်တာဘွဲ့ ၃
ခု ရရှိထားပါတယ်။ သူဟာ ပြင်သစ်နိုင်ငံမှာလည်း သွားရောက်ပြီး
ပညာသင်ကြားခဲ့ဖူးပါတယ်။ စိတ်ဝင်စားစရာ အကောင်းဆုံး အချက်တစ်ခုကတော့
ပတ်ဂွန်ဟေးဟာ ဘယ်တုန်းကမျှ လက်ထပ်ခဲ့ဖူးခြင်း မရှိတဲ့ အပျိုကြီးတစ်ဦး
ဖြစ်တာပါပဲ။ :D
ကမ္ဘာကျော်မြင်းစီးအက
အခုတောင်ကိုရီးယားသမ္မတအဖြစ် ကျမ်းသစ္စာကျိန်ဆိုခဲ့တဲ့ ပတ်ဂွန်ဟေးကို
နိုင်ငံရေးစိတ်ဝင်စားသူတွေနဲ့ နိုင်ငံတကာသတင်း စိတ်ဝင်စားသူတွေကလွဲပြီး
အခြားလူတွေက သိချင်မှ သိပါလိမ့်မယ်။ ဒါပေမယ့် "အိုပါ ဂန်းနန်းစတိုင်လ်...."
လို့သာ ပါးစပ်ကနေအော်ပေးလိုက်.... ကလေးကအစ၊ လူငယ်လူလတ်မကျန်၊ လူကြီးအဆုံး
အားလုံးနီးနီးက လက်မမြောက်ရင်တောင်၊ လက်ကလေးဟိုလှုပ်ဒီလှုပ် မလှုပ်ရင်တောင်၊
ခေါင်းလေးဟိုရမ်းဒီရမ်း မရမ်းရင်တောင်၊ ခြေထောက်လေး ဟိုခါဒီခါ မခါရင်တောင်၊
ခါးလေးဟိုကော့ဒီကော့ မကော့ရင်တောင်၊ သံစဉ်အလိုက်လေးကို
လိုက်မဆိုဖြစ်ရင်တောင်၊ မျက်နှာပေါ်မှာ အပြုံးလေးတစ်ချက် လက်သွားမှာကတော့
သေချာသလောက် ရှိပါတယ်။ စကားမပြောတတ်သေးတဲ့ ကလေးတွေတောင်မှ PSY ရဲ့ Oppa
Gangnam Style ကိုကြားရင် လက်မြောက်ခြေမြောက် လိုက်ကတတ်ကြပါတယ်။
သေချာတာကတော့ ဂန်းနန်းဟာ ကမ္ဘာလုံးဆိုင်ရာ အမှတ်သင်္ကေတ ဖြစ်သွားပါပြီ။
အဲဒီသီချင်းကို ကိုရီးယားလို ဆိုတတ်ဖို့ မလိုပါဘူး၊ အဓိပ္ပါယ် မသိရင်လည်း
ကိစ္စမရှိပါဘူး၊ အဲဒီတီးလုံးသံ ကြားတာနဲ့တင် ကြားရသူကို အလိုလို
မြူးကြွလာစေနိုင်တဲ့အထိ ကျွန်တော့်တို့တွေကို လွှမ်းမိုးထားခဲ့ပါပြီ။
ကျမ်းသစ္စာမဆိုမီ မြင်းစီးခြင်း
တောင်ကိုရီးယားသမ္မတသစ် ပတ်ဂွန်ဟေး ကျမ်းသစ္စာကျိန်ဆိုခြင်း မပြုမီမှာ
တောင်ကိုရီးယားအဆိုတော် PSY က ကမ္ဘာကျော် မြင်းစီးအကကို အားပါးတရ ကပြသီဆို
အသုံးတော်ခံသွားပါသဗျာ။ ရှုစားတော် မူကြည့်ကြပါဦး။ အခမ်းအနား
တက်ရောက်လာကြတဲ့ ဧည့်သည်တော်ကြီးတွေ ခမျာမှာလည်း ရှိုးနဲ့မိုးနဲ့
ပြင်ဆင်လာပြီး ရုပ်တည်ကြီးတွေနဲ့ လာထိုင်ပါမယ်ဆိုမှ PSY က ရှေ့ကနေပြီး
အိုပါးဂန်းနန်းစတိုင်လ်ဆိုပြီး လုပ်ချလိုက်တော့ ပြုံးစိပြုံးစိတွေ
ဖြစ်ကုန်ကြပါလေရောလား။ နောက်... ဧည့်သည်အဖြစ် တက်ရောက်လာတဲ့
ထိုင်းဝန်ကြီးချုပ် ရင်လပ်ရှင်နာဝပ်လည်း ကင်မရာတွေဘာတွေထုတ်ပြီး ဓာတ်ပုံတွေ
ရိုက်ယူရတဲ့အထိ ဖြစ်သွားရတော့တာပါပဲ။ ကျမ်းသစ္စာကျိန်ဆိုပွဲကို လာအားပေးတဲ့
ပရိသတ်တွေ ဆိုတာကတော့ ပြောမနေနဲ့တော့၊ လွတ်လပ်ပေါ့ပါးလိုက်သမှ
ကြည့်နေတဲ့လူတောင် အပျော်တွေ ကူးစက်သွားရတဲ့အထိပဲ။
ကျွန်တော်တွေးမိတာတွေ
တကယ်လို့များ ကျွန်တော်ကိုဉာဏ်က ၂၀၁၅ သမ္မတသစ်ရဲ့ ကျမ်းသစ္စာကျိန်ဆိုပွဲမှာ
စိုင်းစိုင်းခမ်းလှိုင်က တောဂေါ်လီ သီချင်းနဲ့ "အိုးလေးလှုပ်ပါဟေ့
ရေအိုးလေးလှုပ်ပါဟေ့" ဆိုပြီး ဖျော်ဖြေမယ်လို့ ပြောခဲ့မယ်ဆိုရင်
ကျွန်တော့်ကို အရူးဆိုပြီးတော့များ ဆေးရုံတွေဘာတွေ ပို့ကြမလား
မပြောတတ်ပါဘူး။ ဒီလိုလျှောက်တွေးမိတဲ့အတွက် ကျွန်တော့်ကို
အပြစ်တော့ဖြင့်လည်း မဆိုသင့်ဘူးလို့ ထင်ပါတယ်။ တောင်ကိုရီးယားတွေတောင်
သမ္မတသစ်ရဲ့ ကျမ်းသစ္စာ ကျိန်ဆိုပွဲမှာ အိုပါးဂန်းနန်းစတိုင်လ်ဆိုပြီး
မြင်းစီးအက ကနေကြသေးတာပဲ ကျွန်တော်တို့ မြန်မာနိုင်ငံမှာလည်း
အိုးလေးလှုပ်ပါဟေ့ ဆိုပြီး ဘာဖြစ်လို့ မကနိုင်ရမှာလဲ၊ မဟုတ်ဘူးလားဗျာ။
အင်း... တွေးကြည့်ရတာနဲ့တင် အတော်စိတ်ဝင်စားမိပါတယ်။
တောင်ကိုရီးယားသမ္မတသစ်ရဲ့ ကျမ်းသစ္စာကျိန်ဆိုပွဲ မစတင်မီမှာ PSY က Oppa
Gangnam Style နဲ့ ဖျော်ဖြေခဲ့တာကတော့ တကယ်ပါဗျာ။ တစ်ကမ္ဘာလုံးလည်း
အံ့သြခဲ့ရပါသတဲ့။ တစ်ကမ္ဘာလုံးရဲ့ အသည်းကျော် PSY ကို
တောင်ကိုရီးယားသမ္မတသစ်ရဲ့ ကျမ်းသစ္စာကျိန်ဆိုပွဲမှာ ဖျော်ဖြေစေခဲ့တာဟာ
အခြားသော ကမ္ဘာ့နိုင်ငံအသီးသီးက ဖြစ်လာလတ္တံ့သော သမ္မတသစ်များအတွက်
ကျမ်းသစ္စာကျိန်ဆိုပွဲ စတိုင်လ်အသစ်များ ဖြစ်လာလေမလားလို့ ကျွန်တော်ကိုဉာဏ်က
တွေးကြည့်နေမိပါတယ်။ နောက်တစ်ခု ကြံကြံဖန်ဖန် တွေးမိတာက
ကျမ်းသစ္စာကျိန်ဆိုပွဲမှာ တက်လာကြတဲ့ လူဦးရေရဲ့ ရာခိုင်နှုန်းဘယ်လောက်ဟာ PSY
ရဲ့ Gangnam Style နဲ့အတူ ကချင်ခုန်ချင်၊ ဆိုချင်ပျော်ချင်လို့ လာကြသလဲ
ဆိုတာပါပဲ။ အဲဒီလို တွေးကြည့်မိတော့လည်း အပျိုကြီးပတ်ဂွန်ဟေးကို
မျက်နှာပူမိပါသဗျာ။
စောင့်ကြည့်ကြစို့
မြောက်ကိုရီးယားနဲ့ တင်းမာမှုတွေ ပြန်စနေချိန်နဲ့
အချိန်ကိုက်ကျမှ တောင်ကိုရီးယားသမ္မတ လာဖြစ်ရတာဆိုတော့ ကိုရီးယားကျွန်းဆွယ်
အရေးကိစ္စနဲ့ပတ်သက်ပြီး မြင်းစီအကထဲက ဇက်ကြိုးကိုထိန်းသလို
ထိန်းသိမ်းနိုင်မလား၊ ဂန်းနန်းစတိုင်လ်ထဲကအတိုင်း မြင်းလေးကို
အသားကျလေးစီးပြီး ကြွကြွရွရွလေး ပြေးသလိုမျိုး တောင်ကိုရီးယားနိုင်ငံကို
မောင်းနှင်သွားနိုင်မလား ဆိုတာကတော့ဖြင့် စောင့်ကြည့်ကြဦးစို့လို့သာ
ပြောရင်းဖြင့်.....။
0 comments:
Post a Comment